蘿蔔煮魚崧 Turnip and Fish Paste Fillet Stew

蘿蔔真係鮮甜美味，又平又有益，冇得頂。買左個肥嘟嘟白蘿蔔3.5元，問菜檔要芫茜代替蔥，再買四兩鯪魚膠7元，就係咁簡單，就可以煮出一大碟。

做法：

蘿蔔切條。芫西切短度。

魚膠落適量水、一隻蛋白、加少少鹽、糖、蔥、再加入兩湯匙麵粉開成魚漿，目的係要魚崧軟滑D。

原本買番黎既魚膠煮熟後比較硬身，用魚漿煮起後幼滑D，咁樣同蘿蔔一齊煮口感豐富D。

先煎好魚漿，攤凍後切長條。薑絲起鑊爆炒蘿蔔，加水炆煮至轉透明色，此時加入兩隻乾辣椒(剪絲)，加入魚崧，蓋上蓋用細火煨煮。

煮至開始收汁，調味(蠔油、紹酒、鹽、雞粉)，埋獻，上碟前加入一半芫茜兜勻，上碟後再放少少芫茜裝飾即成。