我同屋企人都鍾意飲清補涼湯架。清補涼有好多版本，最近覺得東方紅既清補涼唔錯，二十幾元一包，材料每樣都獨立包裝，企企理理。
再買舊脢頭瘦肉煲。我煲湯唔鍾意用瘦肉，瘦肉煲完又乾又硬唔食得。脢頭瘦肉就唔同，買番黎出耐D水，再切走大部分肥肉，留番少少肥煲湯，好味又可以食番。街市肉檔阿叔話「冇人用脢頭煲湯架」，我咪人囉，我會用脢頭煲湯架。
獨立包裝清補涼料，有茨實、洋薏米、蓮子、百合、玉竹、淮山、龍眼肉、雪耳。
煲法易過借火，呢個湯係懶人湯，乜鬼野都掉晒落個煲度，文火煲三個鐘就飲得。我鍾意食雪耳，加料落多一朵！
順便抄埋包裝袋說明(佢參照《本草綱目》、《中藥大辭典》)
茨實：補脾益精，祛濕止瀉。
洋薏米：健脾利濕。
蓮子：健脾開胃。
百合：養陰潤肺，紓緩咳嗽。
玉竹：養陰潤燥，生津止渴。
淮山：健脾補肺，固腎益精。
龍眼肉：補脾益血，安心寧神。
雪耳：滋陰潤肺，養胃生津。
嘩，真係好野，飲緊都要影多張。飲呢個湯對個脾最有益，脾係咪即係食牛什牛膀個膀呀？
好食 好飲 又有益 唔唔 不過我好懶啊 絕小煲湯 真係好好食啊d料
回覆刪除呢包料真係唔錯，幾好食，不過好似少左一味「沙參」。
回覆刪除我做過實驗喇 , 用脢頭瘦肉來熬湯始終是不夠肉味的 , 它只適宜作餸菜 用 。 以 [豬] 熬出來的湯就香濃鮮甜得多 , 可買 [有筋豬] 或 [豬仔] , 即使煲久了肉質也一樣軟滑 。 [排骨頭] , 即 [唐排] 的頂端部 , 煲湯一流 , 湯味香濃 , 而且煲過湯的排骨頭很好吃啊 !
回覆刪除中藥材很多都是有補脾效益的 。 雖然我對中醫學問不熟悉 , 但就西方醫學來說 , 脾臟 ( Spleen ) 是人體一個非常重要器官 , 它是人體的血庫 , 也是人體最大的免疫器官 , 含有大量淋巴細胞 ............... 若脾臟機能健全 , 則人體的血氣供應也充足 , 而對抗疾病的能力也強大 。
至於 [牛膀] , 乃牛的胰臟 ( Pancreas ) , 而豬橫脷則是豬的胰臟 。
[清補涼湯] , 我和家人都愛吃啊 !
哈哈，你好呀。你係咪講豬展呀？豬展係夠滑，不過我唔鍾意陣味，豬展有D腥腥地。
回覆刪除排骨頭我都成日用黎煲架，有骨味又有肉味，好正。不過有時唔想煲骨，我會買「不見天」連皮煲。
不見天最香，煲完又可以食，但係肥D。清補涼好少煲不見天，我又唔想有骨。所以有時我會煲脢頭瘦肉代瘦肉。