肥哉四喜酥角 Deep Fried Four Happiness Chinese New Year Dumpling

 

 

今日年26，肥哉響度同大家拜個早年，祝大家馬年事事如意，身體健康！我仲帶左包四喜酥角上黎同大家賀年添！

   

呢包酥角唔係買架，係我肥哉特製架！話說本來想買包角仔過年算數，點知見到鋪頭既角仔又貴又唔靚。街檔果D都貴，普通平民麵包鋪都賣成60元一磅，而且好多都甩皮甩骨，買唔落手。於是今年自已整啦！

 



 

呢個肥哉版角仔，用左四種餡料：合桃、杏仁、芝麻、花生。過年嘛，起個好意頭既靚名，一於叫做四喜酥角！

 



加入合桃同杏仁，更健康，口味更豐富！

 

先整個酥角皮，我上網參考左阿韋太既配方，不過開粉既油我就全用橄欖油代替。 





搓好皮用碌棍仔開皮，再用水杯給出圓形酥角皮，就可以包。

餡料先將花生用白鑊烘熱，剝衣，再將合桃、杏仁烘一烘香，再烘香芝麻。將四喜料放入膠袋內打碎。唔駛太碎，由得佢大大細細一粒粒就好。再加白砂糖撈勻就搞掂。

呢個皮料既份量，我一共包左三十隻角仔。

 

開油鑊，用中火將油燒熱，放入角仔慢慢炸，火唔要太猛，要控制油溫唔好太高，咁樣可以令角仔表面滑淨D唔會爆開。

 

 炸到金黃色就可以撈起瀝乾油份。

 

用廚紙索油後，可以上碟！嘩，正呀！真係夠膽講正過街買架！

 

忍唔住偷食左兩隻，好好味！傳統角仔多數只用花生砂糖，我加左合桃同杏仁，好食好多喎！

     

酥角攤凍後可以入膠袋保存或者送俾朋友，同賀新春！肥哉響度恭祝各位四季平安，喜氣洋洋！

 

 

 

酥炸雞排 Deep Fried Chicken Steak

開開油鑊，唔想浪費成鑊油，於是炸埋屋企最後一塊雞扒，就整左呢碟酥炸雞排。

雞扒解凍後，略為片開部分厚肉，再用刀背將肉打鬆。用豉油、喼汁、紹酒、鹽、糖、胡椒粉、雞粉、麻油調味，放入雪櫃醃至入味。

之後將雞扒均勻拍滿麵粉同碎麥片，放入滾油中炸至表面金黃酥脆。

炸好後用廚紙索油，斬件上碟。

雞扒外皮香脆，裏面雞肉剛熟，軟滑有肉汁！不過都幾熱氣，每人限兩件好喇。

玉桂鹽炸豆腐角 Deep Fried Triangular Sliced Bean Curd Sprinkled With Cinnamon Salt

呢味炸豆腐角係肥哉童年回憶，唔知大家有冇印象？如果有印象，你都係同我一樣，係老餅一塊喇！

記得細個時，間中會同大人去沙田萬佛寺，附件仲有間西林寺。果時去要行一條條好長既石級，響石級旁邊，就有好多檔賣油炸豆腐既檔口。

果D油炸豆腐切成三角形，有幫襯店主就會用紙摺個三角兜裝住，沈少少鹽就俾客人。細個時去萬佛寺同西林寺，最記得既唔係果D佛象，而係呢D外面脆口裏面軟滑既炸豆腐角。

我其實好少炸野，今日貪得意試整下，懷下舊！

呢款炸豆腐角真係抵食！四元磚豆腐，可以切出二十幾塊豆腐角。唔洗落任何粉同調味，就咁放入油鑊炸就得。

逐D逐D炸，最後全部放入油鑊再炸一炸即可，用廚房紙吸油就上碟。

再灑上自製玉桂鹽(用白鑊燒熱鹽，加少少玉桂粉撈勻)，趁熱食。

嘩！正呀！簡簡單單已經非常好食！

 兒時回憶返晒黎！

咸肉炒大豆芽 Stir-Fried Salted Pork Strips And Yellow Bean Sprout

呢碟小炒用料：上海咸肉適量切幼條，大豆芽一斤，蝦米適量。

咸肉先出出水略減其咸味，再切幼條。大豆芽用白鑊烘乾水。蝦米浸洗乾淨。

燒熱鑊落油，落兩片薑片，加入蝦米爆香，再加入大豆芽大火快炒，贊水贊酒，將豆芽炒軟。

再落咸肉，加適量水或雞湯略煮一煮，煮至收水，落適量紅椒粒，炒勻埋獻即可上碟。
 
最後灑上葱粒。

呢款小炒咸、香、辣，幾惹味，豆芽口感爽韌，蝦米有咬勁，長者或無牙力者不合。

 

熟鐵鑊煎滾馬頭魚番茄湯 Boiled Fried Horse Head Fish With Tomato

熟鐵鑊幾十元就有一隻，方便易用，開好鑊就唔會黐鑊，佢含炭量少，唔會抹出黑色，比生鐵鑊乾淨。

今日就要試下用隻熟鐵鑊煎魚再滾湯，睇下效果係點。

買左一兜三條25元馬頭魚，加四個番茄。

先洗乾淨魚，用紹酒同鹽醃魚，放入雪櫃醃夠時間。

煎魚：燒熱鑊落兩片薑，再放入抹乾身既魚，煎香一邊，再煎另一邊。

隻鑊非常好用，完全唔會黐底，三條魚都係自動離底！

睇下煎得幾通透，而且唔會有黑色，煎完既鑊底油都冇黑色架。

跟住洗鑊再燒乾，放入清水或雞湯八碗，煮滾。放入馬頭魚，加蓋大火煮之。

約十分鐘開蓋，湯色已經轉奶白。此時放入切好既番茄四個，再加蓋滾十分鐘。

試味調味，完成！湯色微橙黃，唔會轉黑。幾十元隻熟鐵鑊，物超所值啦！

節瓜冬菇蝦米煮豬肉 Stewed Sliced Pork With Hairy Melon, Mushroom and Dried Shrimps

去街市買節瓜，通常都唔駛問價，點知今日買到我「破產」，秤左先知要22元斤，唔夠錢俾！事頭婆話唔緊要聽日先俾啦！

佢話近日冇節瓜到，呢D係海南島節瓜黎。兩個節瓜要二十幾元，真係要好好㗳真味道喇！

 

本來呢個平民家常送唔會影相，但係因為兩個矜貴節瓜，要記一記！煮左款節瓜冬菇蝦米豬肉，呢幾樣食材味道好夾，點整都好好味！

冬菇用左99元斤既平價冬菇仔，貪佢細細隻又唔厚身，快熟而且又夠香味，比某D貴價花菇仲香。蝦米用左泰國麗蝦，豬肉用左20元脢頭。

先爆炒豬肉，再落節瓜、冬菇、蝦米，加水煮至節瓜腍度適中，埋個薄蠔油獻，即成，用隻雞公碗上枱，更有平民住家風味！

麵包機整亞麻子法包 Mechine Made Flax Seed French Bread

想用埋屋企既麵粉，於是整左呢個法式包，落左一匙羹亞麻子，用麵包機整，要整五個鐘。

夜晚開機，真係整到天光！

質地真係同法包差唔多，外皮硬，咬到牙骹都軟。底部仲清晰可見麵包機底隻攪葉既印㾗。

切開一片片，今日唔煮飯，淨係煮送，食自家製法包當飯。