鴛鴦苦瓜枝竹炆排骨

中國苦瓜+泰國苦瓜各一個，7元。枝竹一包7元(枝竹以前5元包，一包多過而家，而家加左價，又少左)。腩排兩條26元。

蒜頭、豆豉、薑適量。

苦瓜切件，浸鹽水。枝竹浸軟剪度。排骨用糖、生抽、老抽、生粉、酒醃勻。

起鑊爆炒排骨至微焦香鏟起備用。

蒜頭豆豉薑片再起鑊，爆炒苦瓜，鏟起備用。

轉用瓦煲，燒熱個煲，放入排骨(連汁)、枝竹先炆煮一陣。

再加入苦瓜，加適量水，加蓋炆一陣。

開蓋，加獻汁(老抽、糖、生粉、水)，撈勻，加蓋，轉大火炆至收汁。

上碟，開飯喇！

鴛鴦苦瓜搞搞新意思，枝竹索晒D汁，好入味。我鍾意收汁，鍾意苦瓜有D咬頭。如果鍾意多汁可以落多少少水，鍾意腍D口感，可以炆耐D。