西蘭花兩棵$7.9
雲耳適量。
清清地炒呢碟菜，清下腸胃。西蘭花浸洗乾淨，切好再沖洗，先用油鹽水焯至八成熟，瀝乾水備用。
雲耳浸軟，用豉油、糖、油撈一撈。燒熱鑊，加油加薑片，爆香雲耳，贊水煮三五分鐘兜起瀝乾水備用。
再用薑片起鑊燒熱，落西蘭花大火快炒，贊酒，再將雲耳回鑊，繼續大火快炒，落調味炒至均勻即可上碟。
呢碟清炒西蘭花雲耳，有益健康，食多兩件無妨！
罐頭豆豉鯪魚越賣越貴，不如自製！
新鮮游水鯪魚唔平，改用廉價鱭魚，魚檔一碟十條，賣13元，買左一碟。魚檔劏魚好馬虎，唔乾淨，返黎要慢慢清洗，去頭去清內臟黑膜。
用少少粗鹽省下內外魚身，加入紹酒，放入雪櫃醃佢一個鐘以上。
醃好後，放入熱油中炸至通透，炸至全身連骨都金黃酥脆為合。
其實此時已成酥炸鱭魚，好香口。不過今次要整豆豉鱭魚，所以仲未完成。
將豆豉加在魚上，大滾水隔水蒸15分鐘。
取出，淋上自家調製甜豉油，贊少少熟油，即成豆豉鱭魚。個樣同口感都幾似罐頭豆豉鯪魚架，味道都唔差架！
行過灣仔東方小祇園，見到大大隻既蓮蓉酥角，勾起了兒時回憶。
好多好多年前家在灣仔，新年時食油角，點都唔夠這家的蓮蓉酥角好味，印象深刻。
今次見到既酥角比較大隻，大約大左一倍左右，每隻5.5元，買左四隻。
買時已經係凍既，返到屋企用個光波爐「光」佢幾下。
趁熱食，蓮蓉味道調校得好好。童年美味全部返晒黎。
酥角多數用豬油搓皮，但係呢間係齋鋪，唔知點整到咁酥，不過一定係肥油，好鬆化，剪開一半，一啖只能食到半隻。如果渣住食一定食到一檯一地都係！
其實食一隻已經肥油超標，但係食半隻又唔夠喉，最終都忍唔住食埋另一半。
節瓜煮肉片係常備家常菜，我曾經貼過文。見呢度↓
http://blog.yahoo.com/_GTVKXK26JCKSEBAIIJPTGF4PU4/articles/34750
今日唔覺意又整，加埋甜梅菜，更惹味。
節瓜兩個10元，脢頭瘦肉20元，甜梅菜適量。
節瓜切片，脢頭瘦肉切片醃好(鹽、糖、紹酒)，甜梅菜洗淨切粒。
先將海菜爆炒兜起、節瓜用兩片薑片爆炒贊水炒至表面略呈透明兜起、肉片爆炒至面微熟，落節瓜片，加水大火煮到節瓜腍身，肉片全熟。
最後加埋甜梅菜，兜均滾起即可上大碗。
梅菜要後下，如果唔係會腍過頭兼冇晒味(走晒入湯汁度)。
另外全程唔可以落豉油，如果唔係節瓜容易有酸味。
呢個菜式可以多少少汁，撈飯一流。又可以加更多水，半煮半湯，加入飯粒就變成湯飯，好好味！
