茄汁洋蔥牛柳 Fried Beef Fillet With Onion In Tomato Paste

本來諗住整中式牛柳，但係又落「番」茄，又落「洋」蔥，又落「急」汁，咁多外國野，點解仲叫中式呢？



於是叫番佢做茄汁洋蔥牛柳好過。



牛柳四塊80元，肉檯大叔幫我用針椎椎鬆。呢碟只係用左三塊，每塊一開三，共九件。

番茄兩個自製茄汁，洋蔥半個切條。牛柳先調味，加入鬆肉粉，放雪櫃醃一個鐘以上，再加水、生粉、油撈勻靜置十幾分鐘。



將牛柳煎至兩面微焦，兜起。



爆炒洋蔥，牛柳回鑊，落茄汁、急汁炆煮一陣，埋獻略收汁即可上碟。



牛柳好味，有咬口又冇渣。不過夾起成大塊牛柳，仍要用力咬先可以咬開牛肉纖維，可能要切薄D、落更多鬆肉粉同醃過夜。