再整個湯。滑豆腐一塊三元切碎，放入一鑊大滾水中，加油鹽薑片滾一陣。
鯪魚膠用匙羹逐羹逐羹筆入湯中，做成魚球。再滾起滾十五分鐘。
調味。如果想好味D，可以用雞湯底滾呢個湯。
碗中放生菜絲，將滾湯用料倒入碗中，將生菜絲灼熟即成。
2011年5月2日 星期一
蠔油豆腐 Fried Bean Curd In Oyster Sauce
買左兩塊滑豆腐，六元，整一送一湯。
其他配料：生菜一斤五元，魚膠四兩七元。
先整個送：
呢個又係抗通脹菜式，成本唔駛五元！
生菜一棵，用油鹽水灼熟，圍碟備用。
豆腐一塊開十，煎至兩面焦香，落蠔油獻(蠔油、粟粉、盬、糖、生抽、紹酒)炆一陣至獻汁濃稠。
將豆腐排在生菜中間，淋上獻汁，加少少芫茜即成！簡單有益又好味！
2011年5月1日 星期日
馬蹄粟米紅蘿蔔排骨湯 Water Chestnut Carrot Sweet Corn Spare Rib Soup
今日買左馬蹄，粒粒都好靚。
再買左一條粟米，一個紅蘿蔔，斬左27元排骨頭，再買包南北杏，煲左個馬蹄粟米紅蘿蔔排骨湯。
馬蹄洗淨切頭切底，專登唔刨皮，煲好湯連皮都可以食埋。
所有料放入瓦煲，文火煲四個鐘，即成。唔調味都非常甜美，加少少鹽平衡下，吊出肉味，仲好飲！
眼仔碌碌馬頭魚 Chilled Horsehead Fish
你睇下眼仔碌碌架，算好新鮮啦！
今日魚檔好多冰鮮馬頭魚賣，大條小小要2.5元一兩，我見碟碟15元碟既魚仔都好靚，買左一碟15元有3條，醃鹹佢香煎，會好好味！
桂林馬蹄 Kwai Lin Water Chestnuts
全街市只有一檔賣馬蹄，係桂林馬蹄，八元斤，成籮馬蹄都係俾泥封住，未經清洗，好有原始風味架。
我買左五元，洗乾淨，馬蹄其實好靚架，天然顏色好有古典味。
2011年4月17日 星期日
水煮菜乾豬腩 Boiled Dried Chinese Cabbage and Pork Belly
豬腩肉、菜乾適量。
豬腩肉洗淨出水備用。
菜乾浸軟剪頭，徹底洗淨，浸水半天，過水要逐條逐條沖去雜質去沙。
燒熱一大鑊水，放薑片，放入菜乾、豬腩肉煮三小時以上至菜乾腍身。
略為收水，調味即成。
菜乾係「瘦物」，煮豬腩最岩，如果自己一家人食，豬腩唔駛切片，就咁將豬腩煮到鬆化，食時直接用筷子夾爛，鍾意食瘦就食瘦，食肥就食肥。
我話係叉燒餐包 I Said BBQ Pork Bun
左面兩個細包係我整的，右面個大包係街買架。
下面搣開兩邊個細包係我整的，上面得一邊既大包係街買架。
哎也，整麵包好「支力」呀。我寧原整送喇。
跟住麵包機本書，參考佢既「牛油捲」配方，換左三分一杯低筋麵粉，用清水代替牛奶，落少 D牛油。
為左整呢個包，買左26元叉燒、5元乾蔥、5.5元洋蔥、5元蛋(5隻)。麵粉、牛油、麥芽糖以前買落唔計數。
仲響麵包舖買左個正版叉燒餐包4.5元 (見上圖右邊大個一個)。
整餡料：
1 叉燒切粒、洋蔥乾蔥切粒。
2 燒熱鑊，落油，爆香乾蔥、洋蔥，再落叉燒爆炒。
3 落麥芽糖、蠔油、老抽、糖、生粉將餡料煮「杰」，攤凍備用。
整麵糰：
麵包機代勞。
跟住說明書步驟，包好餡料，發好麵糰，入局爐180度12分鐘。
局出黎之後。。。
變左非洲叉燒包喎。。。
今次整得唔成功呀，個包又黑又實。原因可能係：
1 我個局爐好猛火，180度12分鐘已經過左火，個包太深色喇。
2 個包發得唔好，發粉要研究一下。
3 個包質地唔夠軟，買邊種麵粉都要考究一下。
有冇人可以教下我呀喂？？？？
檔口叉燒 Take Away BBQ Pork
今日試整叉燒餐包，去燒臘檔買左一舊半肥瘦叉燒，要26元。係咪又通脹呀？以前買叉燒好似10元都有交易喎。
叉燒最好都係自己整埋啦，快樂你話係咪？不過又要整叉燒又要整包，睇怕整到天黑都冇得食喎。
唯有幫襯街市，街市有兩檔燒臘檔，兩檔都唔正架其實，不過冇得揀乍。
兩檔D叉燒都係就咁放響度露晒出黎架，其實諗落都唔多衛生，唔知放左幾耐，黐左幾多菌。
我買叉燒時見到個師傅用一樽野噴隻燒鴨，樽野形狀好似噴髮膠樽咁，唔知係咩來，係咪噴油呀，都幾搞怪。
2011年4月10日 星期日
番茄煮蛋 Tomato and Eggs
又黎抗通脹菜式，番茄煮蛋，超有益又平又送飯。
番茄買多幾個，我用左六個，蛋三隻。全部加埋唔駛十元。
做法易到痺。番茄煮爛(多D糖，我落紅蔗糖，再落少少白米醋，少少雞粉同鹽)
加入炒滑蛋煮一煮，埋獻調味，灑小小蔥粒搞掂。
番茄同蛋味道好夾，簡簡單單就好。
2011年4月3日 星期日
蠔仔炆冬菇(雙蔬底) Oyster Mushroom Stew on Double Vegetables
買左一斤蠔仔，煎蠔餅只係用左三分一，仲有三分二比較大隻既，用黎炆冬菇。又用剩左D韭菜，加埋兩棵生菜，可以做個雙蔬底。
蠔仔已經熟左，今次起鑊落油落薑片爆香佢，炒到表面金黃色兜起。
本地冬菇十隻，用糖、頭抽、蠔油、炆到夠腍入味。我覺得冬菇又香又好食又平，好食過平價日本花菇(貴價就唔知)。
清炒韭菜生菜，唔駛落任何調昧，排好碟，再排上冬菇。
將蠔仔倒入炆冬菇既汁入面煮滾，贊酒，埋獻(要多D獻汁)，倒在碟中央即成。
個個都話好味道呀！
20元斤蠔仔 Oyster $20 per catty
一吋至吋零長蠔仔。
網友笨啦啦話20元斤蠔仔抵買，我呢邊街市係呢個價錢。我從未買過，因為平時唔會買同整生既蠔，驚多菌。今日要整蠔餅先買乍。
呢幾隻已經煮熟左又沖乾淨水，睇樣都幾靚架。食落都好味，不過都係唔好食咁多。
煎蠔餅 Fried Oyster Cake
今日都冇蠔仔賣，淨係買到比較大粒既中蠔，20元斤，買左一斤(其實只需三分一)。
上網睇左有關做法，以下係我既整法：
材料：鴨蛋2隻、蠔仔適量、韭菜適量、蔥、芫茜適量、番薯粉兩湯匙。
做法：
1 蠔仔沖洗乾淨，再放入大滾水，直至再滾起為止，過冷河，索乾水備用。
2 韭菜、蔥、芫茜切碎備用。
3 鴨蛋係咁意打散，但係唔駛打勻。
4 番薯粉加水、鹽、少少雞粉開成大半碗左右，再加入韭菜粒。
5 燒熱鑊加油，放入蠔仔爆一爆，倒入韭菜粒番薯粉水煎至變透明。
6 倒入一隻鴨蛋液，落蔥、芫茜輕輕推勻繼續煎。
7 反轉面，再倒入另一隻鴨蛋液，煎至兩面凝固金黃色即可上碟。
點魚露黎食，最夾味。番薯粉煙煙韌韌，鴨蛋較有咬勁，我其實係第一次整同食呢款蠔餅(我平時好少食蠔)，都可以啦。
又或者黎一碟芙蓉蛋蠔餅飯，都唔錯！
2011年4月2日 星期六
清補涼豬肉湯 Ching Po Leung and Pork Soup
我同屋企人都鍾意飲清補涼湯架。清補涼有好多版本，最近覺得東方紅既清補涼唔錯，二十幾元一包，材料每樣都獨立包裝，企企理理。
再買舊脢頭瘦肉煲。我煲湯唔鍾意用瘦肉，瘦肉煲完又乾又硬唔食得。脢頭瘦肉就唔同，買番黎出耐D水，再切走大部分肥肉，留番少少肥煲湯，好味又可以食番。街市肉檔阿叔話「冇人用脢頭煲湯架」，我咪人囉，我會用脢頭煲湯架。
獨立包裝清補涼料，有茨實、洋薏米、蓮子、百合、玉竹、淮山、龍眼肉、雪耳。
煲法易過借火，呢個湯係懶人湯，乜鬼野都掉晒落個煲度，文火煲三個鐘就飲得。我鍾意食雪耳，加料落多一朵！
順便抄埋包裝袋說明(佢參照《本草綱目》、《中藥大辭典》)
茨實：補脾益精，祛濕止瀉。
洋薏米：健脾利濕。
蓮子：健脾開胃。
百合：養陰潤肺，紓緩咳嗽。
玉竹：養陰潤燥，生津止渴。
淮山：健脾補肺，固腎益精。
龍眼肉：補脾益血，安心寧神。
雪耳：滋陰潤肺，養胃生津。
嘩，真係好野，飲緊都要影多張。飲呢個湯對個脾最有益，脾係咪即係食牛什牛膀個膀呀？
訂閱：
文章 (Atom)