柴魚白菜花生排骨豬肝粥 Dried Fish, Chinese Cabbage, Peanut, Pork Rib And Liver Congee

柴魚花生豬骨粥煲得多，做法唔講喇。



呢次加埋白菜同豬肝，增加纖維素，又滋補，一於豐富D。



白菜洗淨同柴魚花生豬骨一齊落，煲至粥綿。



食前先落醃好既豬肝，滾熟就可以裝碗。



再落少少同呢個粥係絕配既沖菜吊味，加埋葱粒，就更加和味！

白灼蘭度肉片 Boiled Chinese Broccoli And Sliced Pork

廚房成日煎煎炒炒，油煙好多，有時改下整法，可以減少油煙，洗抽氣扇都慳番。

記得以前讀書有個老師話佢家中煮食只用水煮，烚熟就食，好健康。又聽過朋友講起個外傭做菜成日都係煮煮淥淥，唔駛抹抽油煙機。

兩個理由加埋，都真係幾有說服力架。所以我呢次就唔開油鑊，一於用白灼法。

買左斤好靚無渣芥蘭，再加少少脢頭肉片，就整左呢個白灼蘭度肉片，無油煙操作，一樣好好味喎。

芥蘭摘去大葉(唔係掉，仍然可以灼食)，只留中間部分。脢頭肉切片醃好(今次我落左梳打粉)，我平時炒肉前唔會用粟粉醃肉，今次灼肉就要落埋粟粉，仲要落多D。

白灼芥蘭水要大滾油要多，落薑片、少少鹽同糖，仲可以落少少食用梳打粉，將蘭度灼好排好在碟上。

白灼肉片就要用慢火，水要微滾，落肉片，唔好即刻搞散，由佢pet pet下慢慢灼熟先會滑。

將肉片放在蘭度上，淋上熟油+蠔油+老抽，搞點啦！蘭度卜卜脆，肉片軟軟滑，令人胃口大開！

欖菜肉碎四季豆 Stir-Fried Snap Bean With Minced Pork And Preserved Mustard Leaf And Olive

慶祝第100「炒」！！

呢味送好食又好送得飯，而且成本好經濟，可以響屋企自己炒，唔駛一定去酒樓架。



四季豆一扎14元
絞碎豬水展一包(用三分一就夠)
欖菜一至兩湯羹
泰國乾辣椒四隻
薑絲、蒜蓉適量

材料就係咁簡單，炒一碟計成本唔駛三十元。



欖菜真係幾特別既發明，欖菜既菜，其實係芥菜葉。兩樣野加埋一齊醃，做出獨特美味！粒欖可以起肉剪碎用埋！

四季豆(白豆角其實都可以)撕衣切度。豬肉調味。

先燒熱鑊，落少少油爆炒豬肉，炒至散開兜起，再落油，爆香薑絲蒜蓉，落四季豆乾炒一陣，如果想四季豆乾身D，可以炒至表面微焦收水。



然後逐少逐少贊水，將四季豆炒至約七成熟。此時加入肉碎、乾辣椒、欖菜，用大火快炒，贊酒再適量贊水，將四季豆炒熟。

埋獻收乾汁即可上碟。我鍾意四季豆唔太腍，要有咬口。如果鍾意食腍D，可以贊水炒耐D，甚至可以先灼一灼四季豆先炒，聽講生四季豆有毒，要炒熟先好食，不過我唔鍾意呢個做法。



淨係呢個送已經可以扒三碗飯啦！

大冬瓜扁豆薏米瘦肉湯 Big Winter Melon, Coix Seed, Hyacinth Bean And Lean Pork Soup

大熱天時煲呢個湯最岩飲，我又鍾意食扁豆，所以專登加多D。



大冬瓜即係白霜皮大個既冬瓜，買左二斤，足料D！

煲呢個湯好簡單，將所有材料準備好，放晒入瓦煲煲三個鐘，調味就飲得！



材料：

1 大冬瓜二斤14元
2 薏米一包4元
3 扁豆4元
4 脢頭瘦肉28元(切起少少留俾另一個送用)。
5 蜜棗三個



我煲湯如果落瘦肉，會落脢頭瘦，煲完可以食番，如果落淨瘦，煲完又乾又硬唔好食。豬展都可以食番，不過我覺得豬展有少少腥味。。。

清炒西芹撈淡榨菜蒸牛肉 Mixed Stir-Fried Celery With Steamed Sliced Preserved Mustard And Beef

榨菜蒸牛肉係家常蒸送，今次買左淡榨菜黎蒸，仲撈埋清炒西芹入去！



睇下包裝，原來呢款淡榨菜有兩種防腐劑。食醃漬野本身已經唔係咁健康，又食埋防腐劑仲衰多二錢，不過久唔久食一次冇所謂啦。

屋企仲有半棵西芹，撈個清炒西芹入去，冇咁鹹，又健康D，咁就鄧番勻啦。



做法真係簡單到痺，都唔駛多講咯。



總之蒸好榨菜牛肉，炒好西芹，再撈埋一齊兜勻就搞掂。



真係撈架，熄左火，冇埋獻。食時可以加番適量蒸牛肉汁。



食落真係唔錯，食塊榨菜，再食番塊西芹，中和番！惠康呢舊牛肉又特別好食，今餐零舍開胃！

「老人家」眉豆花生雞腳排骨湯 Old Yellow Melon, Black Eye Bean, Peanut, Chicken Feet, Pork Rib Soup

去街市買料煲湯，行下行下，見到菜檔賣老黃瓜，就買左個黎煲湯。



檔口大叔見我拎住個老黃瓜，就話「煲老人家」呀！



呢個大叔都幾搞野喎！老黃瓜又真係幾似老人家，黃晒、巢晒、起晒皺紋、皮膚粗鞋仲爆拆、又生左一粒二粒老人斑。。。

不過老黃瓜裏面非常嫩滑，煲出黎個湯仲好清潤添架。



買埋眉豆、花生、排骨頭、黃油雞腳，落埋紅棗、蜜棗。



煲三個鐘調味可以飲得，如果再煲，老黃瓜同眉豆都會溶晒得番層皮。



好味！飲湯記得食埋湯渣呀！

香草煎三文魚柳 Pan-Fried Salmon Fillet With Oregano

我從未買過三文魚做送，今日去到超市，唔知買咩好，咁岩行到凍櫃前，就買左呢舊挪威三文魚柳。





響雪櫃摷番樽牛至葉碎，用黎醃魚，就整左呢碟香草煎三文魚柳喇。



三文魚柳起皮，切成大塊，用香草(我落左Oregano Leaves碎)，少少鹽醃一個鐘以上。



燒熱隻平底鑄鐵鍋，落牛油，再將三文魚逐塊放落去煎。



煎至兩面金黃，焦香程度隨個人喜好，我鐘意香口D，就煎耐D。



切少少生菜絲墊底，放上魚塊，再用個「士多啤梨汁」圍邊，就大功告成！

士多啤梨汁係用果占開水再煮濃稠做成，好簡單。

排骨魚腩湯花生麥皮 Peanut Oatmeal In Pork Rib Fish Belly Soup

屋企有幾罐麥皮，係呀，係幾罐呀！食極食唔完，今日整個鹹麥皮，當粥咁食。



琴日已經買左一字排，醃左一日。今日再買舊鯇魚腩，少少花生，先淆個湯，再用黎煮麥皮。



一字排出出水，魚腩煎香，再加兩片陳皮，花生，落水煲滾，煲一兩個鐘至湯白色。



將湯過濾，加入一碗麥皮，用中慢火煮至濃滑。



可以拆番少少魚腩肉，加入麥皮內。



煮至濃度適中，搞掂！



間中轉下口味清清腸胃都唔錯架。

雙芹炒雞丁 Stir-Fried Double Celery And Chicken Dice

鍾意食芹菜既人見到呢碟野一定會好開心，因為唔駛揀，中芹西芹我都落晒，一齊食！



中芹兩棵，西芹一大棵用四條已夠，雞柳一包，紅蘿蔔少量。

中芹切度，西芹批皮切斜度，雞柳切丁醃好，我專登用老抽醃，等一陣炒起個色深D，如果唔係雞肉會白晒晒。紅蘿蔔切三角片。

先用薑片起鑊，大火爆炒雙芹同紅蘿蔔片，炒兩炒即兜起。



再落油燒熱，落雞丁大火爆炒，贊水贊酒，將雞丁炒到將近全熟。



將雙芹紅蘿蔔片回鑊，炒至雞丁全熟，埋獻略收汁，即可上碟。



有益，爽口，甘香，開胃！