紫菜湯貼過一次 （http://blog.yahoo.com/_GTVKXK26JCKSEBAIIJPTGF4PU4/articles/1001628 ），今次再整，做法唔同。
材料：紫菜兩餅，白冬瓜一斤，(鯪魚滑10元，絞碎半肥瘦豬肉20元，呢兩樣只須用三分一份量)。
做法：
1) 紫菜洗淨瀝乾水，留起半碗後用。
2) 冬瓜去核省乾淨皮面白霜，切片。
3) 鯪魚滑同半肥瘦豬肉撈勻，落調味(鹽、糖、豉油、胡椒粉、酒)加一隻蛋，搞至起膠，再撻生魚咁撻十幾下。整好之後睇唔出混入左魚肉架。
4) 煲滾水，先落冬瓜紫菜，滾三十分鐘至一個鐘，令紫菜味全出，冬瓜全腍。
5) 將紫菜冬瓜湯過濾，變成清湯。
6) 另外，煲滾水，用手將魚肉豬肉膠(jit)成肉丸，逐粒放入滾水中，滾至浮面，將肉丸放入凍水中過冷河。
7) 將紫菜冬瓜清湯煲滾，加入肉丸，再煮滾，調味。
8) 最後加入先前留起既紫菜，即可上枱！
呢個做法紫菜味特濃。
肉丸口感唔錯，後下既紫菜又有咬感，冬瓜又清潤，正！
高人，點解鮻魚肉要加免治豬肉呀，咁樣撈埋，口或係點㗎？？？
回覆刪除係爽口㗎？？？
我未試過用冬瓜滾紫菜，平日若果用紫菜滾肉丸，一定會加 “唐芹 及 冬菜” 啖湯會好好味㗎！
我都好想試用鮻魚肉＋免治豬肉，唔知口感係點！
半日安小姐，多謝你黎留言呀！呢個魚肉豬肉丸你一定要試下，我覺得係好正。淨魚肉較腍，淨豬肉較實，而家混合左，岩岩好。仲可以試下唔同比例添，例如多D魚肉少D豬肉。仲有就係要用半肥瘦，唔可以用瘦肉，要有肥肉先好食架。真係抵食夾大件，可以用黎整幾個送。
回覆刪除紫菜湯多數都係係咁意滾下，落唐芹冬菜，係潮州粉麵店口味，我今次係搞搞新意思，將紫菜煲至出晒味，腍晒，旨在攞佢個紫菜清湯，第二輪先另外放番新既紫菜就食得。