白灼蘭度肉片 Boiled Chinese Broccoli And Sliced Pork

廚房成日煎煎炒炒，油煙好多，有時改下整法，可以減少油煙，洗抽氣扇都慳番。

記得以前讀書有個老師話佢家中煮食只用水煮，烚熟就食，好健康。又聽過朋友講起個外傭做菜成日都係煮煮淥淥，唔駛抹抽油煙機。

兩個理由加埋，都真係幾有說服力架。所以我呢次就唔開油鑊，一於用白灼法。

買左斤好靚無渣芥蘭，再加少少脢頭肉片，就整左呢個白灼蘭度肉片，無油煙操作，一樣好好味喎。

芥蘭摘去大葉(唔係掉，仍然可以灼食)，只留中間部分。脢頭肉切片醃好(今次我落左梳打粉)，我平時炒肉前唔會用粟粉醃肉，今次灼肉就要落埋粟粉，仲要落多D。

白灼芥蘭水要大滾油要多，落薑片、少少鹽同糖，仲可以落少少食用梳打粉，將蘭度灼好排好在碟上。

白灼肉片就要用慢火，水要微滾，落肉片，唔好即刻搞散，由佢pet pet下慢慢灼熟先會滑。

將肉片放在蘭度上，淋上熟油+蠔油+老抽，搞點啦！蘭度卜卜脆，肉片軟軟滑，令人胃口大開！