呢排青花熱，想試下泡茶。
幾鍾意呢種舊式包裝設計，條"木嘴"金魚幾搶眼，而家都係賣少見少架。我記得以前個罐面係塗上包裝圖案，而家係用貼紙貼響罐面，已經簡化左。
呢個檔次，講究飲茶既人唔會睇得上眼。
就用個提環壺黎泡茶，聽講唔可以用大滾水，但係我冇溫度計，只係攤左一陣就沖入壺。再沖落杯仔度，慢慢品嘗。
我對泡茶無認識。自然冇講究。志在玩下套青花茶具。
2013年3月31日 星期日
泡龍井茶 Dragon Well Tea
呢排青花熱，想試下泡茶。
幾鍾意呢種舊式包裝設計，條"木嘴"金魚幾搶眼，而家都係賣少見少架。我記得以前個罐面係塗上包裝圖案，而家係用貼紙貼響罐面，已經簡化左。
呢個檔次，講究飲茶既人唔會睇得上眼。
就用個提環壺黎泡茶，聽講唔可以用大滾水，但係我冇溫度計，只係攤左一陣就沖入壺。再沖落杯仔度，慢慢品嘗。
我對泡茶無認識。自然冇講究。志在玩下套青花茶具。
2013年3月24日 星期日
節瓜金菇蝦米煎蛋 Fried Eggs With Striped Hairy Melon, Dried Small Shrimps And Enoki Mushroom
今日煲節瓜湯留起左細半個節瓜，加埋買落既金菇同蝦米，煎三隻蛋，又係一碟送喇。
節瓜切幼條，金菇撕開，蝦米仔浸軟，蛋三隻打勻，落鹽。
燒熱鑊，落油鹽，爆香蝦米仔，再落節瓜，贊水炒至節瓜七成熟。
落金菇炒勻，將所有材料撥向鑊邊(今次用中式鑊黑金剛)，將多餘油同汁液流向鑊中隔開。
將材料倒入蛋液中，撈勻。洗乾淨鑊再落少少油，燒熱，倒入蛋同材料，半炒半煎至外面微金黃內裏嫩滑，即可上碟。
今次專登上隻紅萬壽橢圓形碟，等個賣相色彩美艷D。
用呢隻碟裝，你地夠唔夠膽食呀？
以前好多酒家都係用呢種碟啦，好似傳統名店醉瓊樓就係，我印象最深刻，十年前去食，都仲係用緊紅萬壽碟。
醉瓊樓D碟仲用到好舊，有D仲洗到甩色添架！自從驗出呢種碟既釉彩會釋出毒素，全港酒樓酒家都用清一色白雪雪既餐具，千篇一律，無晒情趣咯。
節瓜花膠雞腳排骨湯 Fish Maw Chicken Feet Pork Rib And Hairy Melon Soup
本來想煲個懶人湯----節瓜瑤柱湯，點知屋企用晒瑤柱，於是搞下搞下煲左呢個湯。
我用既材料：
1) 節瓜四個(13元節瓜要多個湯先夠味)
2) 鱆魚兩隻18元
3) 花膠筒兩個
4) 雞腳六隻10元
5) 排骨頭32元
6) 花生2元
7) 冬菇八隻
8) 蜜棗三粒
9) 紅棗六粒
10) 陳皮一塊
11) 薑片兩塊
我既做法：
1) 花膠煲軟剪開洗淨
2) 雞腳出水洗淨去甲
3) 排骨出水洗淨去碎骨
4) 鱆魚出水搣去眼咀
5) 冬菇浸軟剪掟
6) 節瓜切大塊
7) 花生、蜜棗、紅棗、陳皮洗淨
8) 用雲鼎大瓦煲煲滾大半煲水，然後將材料放晒入去，中火煲四個鐘。調味即成。
落左花膠同雞腳，個湯既「厚度」增加左。
越煲越濃郁越好味。
豆腐炆雙腩(魚腩+燒腩) Braised BBQ Pork Belly And Grass Carp Belly With Bean Curd
豆腐炆火腩同豆腐炆鯇魚腩都係我家家常菜。
買左兩條骨燒肉(要75元) ，揀起一D用黎炆呢個送。再買滑豆腐一塊，魚腩一塊(26元)。
加埋韭菜、蝦米、冬菇、乾椒辣，就係咁多材料。
先煎豆腐兜起。
再煎好魚，撥埋一邊，一邊落冬菇蝦米爆香，再落火腩，加水炆一陣。
再落豆腐繼續炆。
最後加埋韭菜，埋獻隨個人喜好調校收汁程度。
炆出一大碟，有菜有豆，有魚香有蝦米香又有燒肉香，送飯一流！
青花米通碗 Blue And White Transparent Rice Pattern Bowl
呢隻碗係琴日買既，應係新批貨品。10元隻，而家呢個post已經係佢最靚既一面。
你地覺得點？順眼嗎？
驗下D米通，都仍算可以。不過碗底條龍……
並唔係在中央，退歪晒，另一邊摘晒界，而且龍頭矇查查血肉模糊。
再睇下裏面碗邊花紋，真係……
斷斷續續，唔乾淨，一撻撻。
工字圖案唔平行，斜晒，另一邊又高左。仲有中間隻「蝙蝠」化開晒無法辨認。
再睇下呢隻碗外面既圖案，又係……
出晒界，呢度都未算差，仲有……
係咪小學生參觀瓷廠時俾佢試玩架呢隻碗？整到鬼五馬六咁既樣。
睇埋碗底，仲離譜……
碗底圖案離開晒，歪埋一邊。睇真D，最經典既係……
中國景德鎮MADE IN CHINA字樣唔單止化晒蒙過蒙太奇，仲反轉左！碗底粗鞋唔突止，仲有一大粒刮手石。
真係反轉左貼架，個師傅(可唔可以叫佢師傅？)係咪訓緊覺？！
對十元八塊一隻既平民日用瓷碗，我唔會有過高要求，不過而家既人粗製濫造成咁，全不用心，全無誠意，沒有QC，令我感慨既係傳統文化、精神、美德既淪落。以小見大，其他可想而知。
十元買呢隻碗，絕對超值，它已成為我既另類收藏。
2013年3月23日 星期六
青花米通提環壺與蓋碗 Blue And White Transparent Rice Pattern Porcelain Tea Pot And Lidded Tea Bowls
繼續同大家展示下我家的舊版青花米通日用瓷。
呢對係「三件頭」有蓋茶碗(蓋碗)，用佢黎沖茶飲最正！
呢種設計真係聰明。底托等同把手，頂蓋可以撥動茶湯，可以隔開茶葉。
呢對蓋碗既米通比較細粒，係「細米」。
沖一碗台灣碧螺春。
另一碗舊普洱茶餅。
呢個係提環壺，肥都都好可愛。
瓷面潤澤，米通通透，可以裝滾水沖茶，又可以直接泡茶。
呢個壺我記得好多年前響尖沙嘴柏麗大道裕華國貨買，唔記得幾多錢，總之係平野。
我見佢個造型好特別，一見就鍾意。
裕華執下一間執下一間，柏麗大道裕華執左好耐咯，而家好似變左豐澤。
青花米通13頭茶具 Blue and White Transparent Rice Pattern Porcelain Tea Set 13 Items
各位網友同好，如果你地同我一樣都鍾意呢類舊版青花米通瓷，就要留意我呢個貼文喇！
呢套13頭茶具，係今日我偶然響裕華發現。
裕華做緊大減價，兼且要清呢類舊貨，真係大平賣。
定價300都已經算平，而家特價138。13頭即係每件10元到乍。淨係買個提樑壺都已經值回票價，何況仲連埋六隻杯六隻碟！
呢款青花米通瓷，應係舊貨好野黎！做工比而家同類既精細。
茶杯通花仍算玲瓏，呢D好野真係買少見少架。
我鍾意佢既簡樸清雅，呢種傳統韻味同集體回憶，係而家新出既各類新款青花米通瓷無法取代既。
呢D舊版日用瓷，真係好值得珍惜！我今日買時見裕華仲有存貨，13頭只賣138元！各位有買就趁手喇！
訂閱：
文章 (Atom)