合桃炒肉丁

炒呢個肉丁要買幾多料：

西芹半棵7元。紅黃橙籠椒各一個共7元。磨菇一包5元。脢頭瘦肉24元。當然仲有合桃，我買左安記既連衣肉桃肉。

脢頭瘦肉切丁，用老抽、生抽、糖、鹽、酒、生粉醃至入味備用。西芹刨去絲，切短度。紅黃燈籠椒切尖角度。磨菇切片。

薑片起鑊爆脢頭肉丁，加蓋煮一陣。開蓋放入磨菇片，將肉丁煮熟，撈起備用。

再起鑊，落少少蒜蓉爆炒西芹，贊少少水，再落燈籠椒大火炒勻。倒入磨菇肉丁、合桃，埋獻(蠔油、生粉)，炒至完全收汁上碟。

 

沙參玉竹煲雞湯

湯料一包 (沙參、玉竹、蓮子、百合、茨實、蜜棗、淮山、薏米)29元。

雞半隻(去髀)斬件25元。瘦肉一小片。

洗淨湯料放入大瓦煲煲滾。豬肉、雞出水洗淨。

將出左水既豬肉、雞放入瓦煲湯料內，用中火煲三個鐘以上，調味，即可飲用。

 

蜆汁薑絲蝦米蒸水蛋

頭先炒完花蛤，留起D蜆汁，最好用黎蒸水蛋。

於是整左個蜆汁薑絲蝦米蒸水蛋。不過我一時粗心大意，做少左同做錯左D野，整左個錯版。唔錯都錯左，又影埋相，一於照post上黎警剔下世人啦。

三隻蛋，六隻水。蒸水蛋比例：一隻蛋兩隻水，係阿媽教落既。

落少少油打勻。我做少左一樣野，就係整走D泡，又冇封保鮮紙。不過我係知既，只係懶，所以由得佢。

蝦米浸軟，剪碎。薑絲適量。水蛋蒸一分鐘後先落，專登要D料浮面睇到。

我做錯左一樣野：唔記得要用細火蒸，結果用左大火。開蓋落蝦米薑絲時，D蛋都熟鬼晒。落埋料，蒸一陣，蛋面已起皺紋，蒸老左LU。

落蒸魚豉油 + 老抽。其實裏面仲係好滑，只係表面樣衰。下次去泡，慢火，應該會靚好多。

此水蛋無比鮮美。特立此錯版存照。

 

豉椒炒花蛤

花蛤斤半36元。蒜頭、豆豉、指天椒適量。

花蛤浸水吐沙，上碟蒸至開口。留汁另有用途。

蒜頭豆豉爆香油鑊，倒入花蛤大火快炒。贊油，落紅椒粒，埋薄獻，加蓋局之。

收汁即可上碟。

 

 

紅桃粿(肥哉版)

第一次試整紅桃粿，都算成功啦！

工具：木粿模兩個(要先浸油處理)

材料：火龍果一個。糯米雞一隻。生粉(薯粉)、粘米粉、糯米粉各一包。中國芹菜兩棵。蝦米、冬菇、薑蓉適量。

整皮：

1 紅桃粿的桃紅色取自火龍果果皮(可用人造色素，不過用火龍果天然D)。剝火龍果皮，打碎榨汁備用。

2 生粉(薯粉)兩碗，粘米粉兩碗，糯米粉一碗，油半碗撈勻，倒入火龍果汁搓勻。

3 碗半至兩碗水煲滾，沖入粉中，邊沖邊攪拌搓成粉糰備用。

整餡：

1 糯米雞搓散(唔用糯米雞可以自己整糯米飯)，將舊雞剪碎備用。中國芹菜切粒。冬菇、蝦米浸洗後切粒備用。

3 用薑蓉爆香油鑊，爆炒冬菇、蝦米，再落芹菜炒香。將芹菜、蝦米、冬菇加入已搓散糯米雞中，攪勻成餡。

包粿：

取粉糰搓成圓形皮，包入餡料，收口搓勻，塞進粿模中，粉糰須平均壓勻整個模，再用力反扣，打出紅桃粿。

蒸：

水滾計大火蒸8分鐘，即成美艷紅桃粿！

味道都唔錯喎！

雙菇扒菜遠

易整到痺，又有益又好食。

幼長菇兩款：金菇 + 靈芝菇。菜心一斤。

菜心洗淨摘遠。雙菇洗淨搣好一條條。

薑起油鑊，落少少鹽，爆香雙菇。

落菜遠，加少少糖快炒。落適量蠔油炒熟。

上碟，排好菜遠，扒上雙菇即成。

芋頭炆腩排

芋頭一個6元斤。豬腩排兩條29元。

芋頭切件備用。豬腩排洗淨，落老抽、生抽、糖、鹽、酒、粟粉醃勻備用。

薑蒜爆鑊，放入醃夠時間既腩排爆炒至表面轉色。

放腩排入瓦煲，落水炆煮至全熟至腍。再放入芋頭炆至軟爛。

放入蔥度即可上碟。

瑤柱三菇粥

三菇粥係我童年回憶。。。今次用左陳皮瑤柱粥底。

三菇15元：秀珍菇、草菇、磨菇。(以前三菇必有冬菇，今次專登唔用。)

三菇洗淨隨意剪碎，放入已煲好既粥底度，再煲30分鐘以上至粥綿入味。

落鹽調味，此粥菇味豐富，值得一試。