揚州炒飯(肥哉版)

廚房網誌點可以冇揚州炒飯丫，一於整番碟先。呢個係肥哉版！

為左炒呢個飯，要買好多料：雪蝦一斤24元。西式火腿一包19元。肥叉燒一條18元。豌豆2元(呢個好緊要架，我鍾意)。生菜一斤4元。仲要買左盒蛋15元。

冷飯大約三碗，先整散佢備用。

蝦適量剝乾淨，用鹽醃一陣備用。叉燒、火腿、蔥適量切粒。生菜三片切絲。

先炒個蛋炒飯底：

薑起鑊，落冷飯，少少鹽炒散佢。打一隻蛋，整散，炒入飯內，炒勻上碟備用。

再炒料：

先落酒炒蝦，半熟後落叉燒、火腿粒炒勻。

最後飯料一齊炒：

倒入飯、生菜絲、豌豆、蔥粒。大火快炒，落少少鹽調味，炒至聞到揚州炒飯香味，飯乾身即可上碟。

好鬼好食呀，自己都要讚自己呀。。。。。。