毛茄呢種「菜」都幾有趣喎，響惠康買左一包8元，覺得可以用黎炒合桃同蝦仁，於是就整左呢碟野。
合桃係屋企買落用剩既，蝦仁係雪蝦仔，買左一斤36元。
蝦仔清理好，啤好水，索乾水放入雪櫃雪一日。
毛茄洗乾淨切頭切尾再切短度，一路切佢一路出「潺」，用水沖一沖。
我今次學下人「泡嫩油」，先後將合桃、蝦、毛茄都泡過油，再瀝乾、索乾。
然後先至炒：
燒熱鑊，落油，薑片，用大火爆炒蝦仁，贊酒，再落合桃快炒，最後落埋毛茄埋個薄獻，快炒兜起上碟。
呢碟野要趁熱食，毛茄都幾多潺，凍左D潺會凝結好似漿糊咁。
2011年6月30日 星期四
2011年6月29日 星期三
小茴香龍利柳 Sole Fillets With Ground Cumin
又係用鑄鐵鍋焗，做法同上次焗雞翼一樣。龍利易熟，程序可減半。
呢種整法比較健康，可以唔駛落油或者用好少油就得。龍利焗熟後仍能保濕，肉質彈性又冇失去。
討厭的卡位櫃筒枱 I Hate Booth Seat Drawer Table
去茶餐廳之類平民食店，好多人都鍾意揀卡位坐，餐廳侍應好多都招呼客人坐卡位。但係我就最憎坐卡位，其中一個原因係唔少餐廳都用左款好討厭既「櫃筒餐枱」。
響卡位同朋友坐低，一路食一路聊天，失驚無神有人(侍應)會走黎「拉櫃筒」摷野，摷乜野，就係刀呀叉呀匙羹呀筷子呀果D生財工具。擾攘一輪，唔駛一兩分鐘又再黎一次。
有時一個人食緊野，阿姐又失驚無神走埋黎，今次唔係摷野，係擺野：佢懶理你三七二十一，一手拉開櫃筒，一手就將一大堆刀呀叉呀匙羹呀筷子呀補充落裏面。嘈喧巴閉搞一大輪。你以為搞完可以安心食野？唔駛一陣又黎，羅呢樣羅果樣，總之就係搞到你無法安心進食。
可能係我太敏感？唔知你地有冇同感？
「發明」呢種卡位櫃筒枱，用呢種枱既人，一定自以為好聰明，但係我想話佢知，身為顧客既我，好討厭呢種枱。呢種枱唔係為客人而設既，只係為做生意既人，為提供服務既人自己方便而設既。
咁樣做生意，點對得住客人呢？不過話說回頭，可能大部分客人都冇感覺，冇要求掛。或者又係果句：做你幾十元生意，咁多要求！咁巴閉去大酒店啦！
2011年6月28日 星期二
核突生癪碗 Horrible Dirt-Stained Bowl
而家D平民飲食業真係越做越差，其實好多茶餐廳粉麵店已經好耐冇用瓷器碗碟，改左用膠碗碟。我諗係因為瓷器易爛，膠野襟用掛。
不過D膠碗碟唔襟「省」，用耐左，俾類似百潔布呢D粗洗工具省到蝕晒，尤其是係D膠碗，碗內壁已經被洗刷到鞋十十，積左層層陳年污癪，深入內層。洗碗果位又求其(又或者要快)，結果日子有功，隻碗外面米白色，內壁水位以下係啡色甚至深啡色既。隻隻都係咁，話之你，照用黎裝湯河湯麵俾客人食，一次半次唔多覺，次次係咁，稍為諗起都反胃。
你試下認真洗晒D污積出黎睇下，包你作嘔。
不過香港人真係好忙，趕時間求其填飽肚就算啦。仲有種心態係十零二十元碗野想點呀，咁多要求！咁就日日幫襯，顧客冇要求(又或者係冇得揀)，好多老闆就得過且過啦，唔覺唔覺衰DD，唔覺唔覺又衰DD，一個地方既飲食品位就江河日下喇。唉。
2011年6月26日 星期日
鑄鐵鍋焗小茴香雞翼 Baked Chicken Wings With Ground Cumin In Dutch Oven
用Lodge鑄鐵鍋(Dutch Oven)焗野可以鎖水又有烤焗效果，食法同用焗爐唔同。
做起黎又簡單。
雞翼先用以下醃料醃至入味，最好醃過夜：
生抽、老抽、鹽、糖、酒、八角粒、薑粒。
在荷蘭鍋底鋪好鋁箔，放上鋼架，預熱5分鐘。
開鍋，在鋼架放上雞翼，加蓋，燒鍋5分鐘，熄火焗5分鐘。
重複燒鍋、熄火焗三次，直至鍋中雞翼香氣四溢。
最後一次在雞翼面搽上麥芽糖汁，再灑上小茴香粉。
睇下焗出黎既效果，相當唔錯。
呢個做法，雞翼肉質柔軟，絕唔會乾硬，又有烤焗風味。
2011年6月25日 星期六
鹹魚雞粒香芹炒飯 Fried Rice With Salted Fish, Diced Chicken and Chinese Celery
食剩冷飯最好要黎炒，今日炒個鹹魚雞粒炒飯，落多D中芹同薑絲，更加好味。
上星期響新填地街鋪頭買左一片馬友鹹魚，14元，半舊用左黎蒸豬肉，另外半舊今日就用黎炒飯啦。
雪雞扒一塊6元，用半塊就夠。中芹兩元。
鹹魚剪細粒、中芹都係切細粒、薑切絲、雞扒先醃入味，煎熟去皮，肉剪粒。
一切準備好就可以炒。
燒熱鑊，落油，爆香薑絲，落鹹魚粒爆炒至香氣四溢。
落冷飯，炒散，落蛋液，再炒散。
落雞粒，將所有材料炒勻至飯收乾身，落中芹、調味。
再落少少蔥粒，炒勻即可。
呢碟飯係用適量欖油炒，唔會油淋淋。馬友鹹魚濃香綿軟，雞粒腍滑入味，中芹甘香爽口，各種材料都好夾下架。
黑芝麻醬包 Black Sesame Paste Roll
換左隻日本高筋粉，整個黑芝麻「混醬」包。
用左三種醬：黑芝麻醬、花生醬、士多啤梨果醬。
搽到好似張水彩畫咁。
今次發得好勁，真係發到豬頭咁。
個包好鬆軟，不過用呢種整法，落黑芝麻醬整到個包黑猛猛，賣相唔好。
而且三種醬局完，前兩種比較乾，果醬就好好。下次再整就會係果醬包。
2011年6月18日 星期六
藍莓乾合桃全麥包Dried Blueberries Chestnuts Whole Wheat Bread
今次舊粉冇落牛油，用欖油代替，油量落少D。搓出黎舊粉糰比上次硬身同粗糙，可能材料比例冇上次咁準掛。
搓粉中途落藍莓乾，藍莓既顏色令舊粉深色左。搓好之後，第一次發酵後放入合桃碎，隨意捲成包形就算。
Tefal 爐150度12分鐘出爐就係咁樣。其貌不揚，但係都幾鬆軟好食喎。
七彩炒米粉 Fried Rainbow Rice Noodle
我其實好怕買片裝火腿，因為一定一次食唔晒。上次整火腿蛋包淨左大半包火腿，屋企買落一大包銀絲炒米粉，又有洋蔥同咖喱粉，於是今日諗住炒個「星州炒米」。
落街市買左三色椒一包8元，叉燒一條仔21元(貴！)，蝦仔半斤20元。
點解「星州炒米」變左「七彩炒米」？且聽下文分解。
做法：
1) 米粉用凍水浸透浸軟，令粉條全變白色，撈起稍為瀝去多餘水份備用。我炒米粉唔會預先淥熟米粉，如果先用滾水淥，炒出黎會好濕又易斷。
2) 三色椒、洋蔥、叉燒適量全部切絲備用。
3) 蝦仔清洗乾淨處理好，先行炒至八成熟備用。
4) 燒熱鑊，落油，先落米粉炒散，落鹽、魚露、雞粉、生抽調味，炒勻兜起。
5) 爆炒椒絲、洋蔥絲，炒香後落埋叉燒同蝦仔。
6) 米粉回鑊，落適量咖喱粉，較大火將所有材料快快炒勻，視米粉乾濕情況贊水。
7) 試味校味後上碟。
我其實落左成半包咖喱粉，但係碟米粉都冇變黃色，唔似出面食既星州炒米，所以改名為七彩炒米啦。
我諗個黃色關鍵在包咖喱，應該點用咖喱呀？有冇人可以指教下呀？
2011年6月12日 星期日
白瓜黑木耳肉絲清湯 White Melon Black Fungus And Shredded Pork Soup
再滾個湯：白瓜黑木耳肉絲湯
材料：白瓜一個，白背黑木耳兩朵，脢頭肉絲適量。
做法：
脢頭豬肉選腍軟較瘦部分切成絲，醃好至入味，先用大滾水出水清去渣滓，撈起沖乾淨水。咁樣出過水，一陣滾個湯就會好清，唔會濁。
白背黑木耳浸軟，也在滾水中拖拖水，洗淨去硬頭，然後切幾絲。
白瓜切薄片。
一切預備好後，煲滾一煲水，落兩片薑，先放入黑木耳同肉絲滾十五分鐘，再放入白瓜片，再滾十五分鐘，調味即成。
呢個湯清甜好飲，木耳爽脆，仲好有益添！
白瓜炒冬菇豬肉 Fried White Melon With Mushroom And Pork
今日又見到街市有白瓜賣，買左三條要十三元，再買左二十元脢頭豬肉，整一送一湯。
先整個送：白瓜炒冬菇豬肉。
將脢頭肉帶少少肥既部分切片，醃好備用。
冬菇六隻一開三，浸軟，醃好備用。
白瓜兩條刨皮去核，切度。
先炆好冬菇同豬肉，炆到入味，鏟起，再炒白瓜，然後將冬菇豬肉回鑊，校味、埋獻，再落少少乾指天椒絲，兜勻即可上碟。
冬菇豬肉濃香，白瓜清夾，炒埋一碟，可以互相平衡。
眉豆紅棗花生豬尾骨湯 Eyebrow Bean, Red Date, Peanut and Pigtail Bone Soup
呢個湯靈感來自陳榮師傅本《入廚三十年》，佢教煲既係「眉豆煲豬尾」，我加埋花生，將豬尾改左做豬尾骨。
煲出黎個湯，比我想像中鮮甜好飲，又有花生同豬肉食，唔錯架。
做法：
1) 豬尾骨出水，清理碎骨，沖洗乾淨備用。
2) 眉豆、花生、紅棗各適量，洗淨。
3) 煲一大煲水，煲滾後，先放人豬尾骨、花生、紅棗用中火煲一個鐘。眉豆要後下。如果唔係會煲到溶，剩番D衣。
4) 一個鐘之後，再放入眉豆，再煲個半鐘。
5) 個半鐘後，調味即成。
豬尾骨都幾多肉，煲完可以食渣。
2011年6月11日 星期六
全麥火腿蛋包 Whole Wheat Ham And Egg Bread
睇下個包都算似樣掛，食落都好鬆軟，同麵包鋪買既冇分別架，哈哈。
自已整一於要雙層火腿蛋，加足料！
我個局爐好猛火，用150度局10分鐘就岩岩好，自己整真係最好味架。
不過我冇乜整麵包既工具，第一次試整控制唔到個包型，不過好食，個包既質地達到要求就好開心喇。
一出爐就食左兩大個，食到而家都滯滯地，今晚睇怕唔駛食飯咯。
訂閱：
文章 (Atom)