去茶餐廳之類平民食店，好多人都鍾意揀卡位坐，餐廳侍應好多都招呼客人坐卡位。但係我就最憎坐卡位，其中一個原因係唔少餐廳都用左款好討厭既「櫃筒餐枱」。
響卡位同朋友坐低，一路食一路聊天，失驚無神有人(侍應)會走黎「拉櫃筒」摷野，摷乜野，就係刀呀叉呀匙羹呀筷子呀果D生財工具。擾攘一輪，唔駛一兩分鐘又再黎一次。
有時一個人食緊野，阿姐又失驚無神走埋黎，今次唔係摷野，係擺野：佢懶理你三七二十一，一手拉開櫃筒，一手就將一大堆刀呀叉呀匙羹呀筷子呀補充落裏面。嘈喧巴閉搞一大輪。你以為搞完可以安心食野？唔駛一陣又黎，羅呢樣羅果樣，總之就係搞到你無法安心進食。
可能係我太敏感？唔知你地有冇同感？
「發明」呢種卡位櫃筒枱，用呢種枱既人，一定自以為好聰明，但係我想話佢知，身為顧客既我，好討厭呢種枱。呢種枱唔係為客人而設既，只係為做生意既人，為提供服務既人自己方便而設既。
咁樣做生意，點對得住客人呢？不過話說回頭，可能大部分客人都冇感覺，冇要求掛。或者又係果句：做你幾十元生意，咁多要求！咁巴閉去大酒店啦！
非常之不好的設計, 我最怕阿姐走過來,拿刀义, 吃東西是一種享受, 我好怕比人影響進食
回覆刪除係呀，所以我有卡位都唔會坐架。我會坐圓枱大枱。哈哈。
回覆刪除