我其實好怕買片裝火腿，因為一定一次食唔晒。上次整火腿蛋包淨左大半包火腿，屋企買落一大包銀絲炒米粉，又有洋蔥同咖喱粉，於是今日諗住炒個「星州炒米」。
落街市買左三色椒一包8元，叉燒一條仔21元(貴！)，蝦仔半斤20元。
點解「星州炒米」變左「七彩炒米」？且聽下文分解。
做法：
1) 米粉用凍水浸透浸軟，令粉條全變白色，撈起稍為瀝去多餘水份備用。我炒米粉唔會預先淥熟米粉，如果先用滾水淥，炒出黎會好濕又易斷。
2) 三色椒、洋蔥、叉燒適量全部切絲備用。
3) 蝦仔清洗乾淨處理好，先行炒至八成熟備用。
4) 燒熱鑊，落油，先落米粉炒散，落鹽、魚露、雞粉、生抽調味，炒勻兜起。
5) 爆炒椒絲、洋蔥絲，炒香後落埋叉燒同蝦仔。
6) 米粉回鑊，落適量咖喱粉，較大火將所有材料快快炒勻，視米粉乾濕情況贊水。
7) 試味校味後上碟。
我其實落左成半包咖喱粉，但係碟米粉都冇變黃色，唔似出面食既星州炒米，所以改名為七彩炒米啦。
我諗個黃色關鍵在包咖喱，應該點用咖喱呀？有冇人可以指教下呀？
嘻嘻 好似炒粉麵 我就未做過啦 好似難過整包咁 嘻嘻
回覆刪除如果D米粉上到咖喱既黃色，就係星州炒米啦。我覺得炒火粉易過整包喎，整包難呀。
回覆刪除你呢隻係乜野牌子既米粉黎架？我本身好鍾意食米粉，但就係搵唔到合心水既，本來我食開東莞米粉，但而家佢唔好講炒啦，淨係放湯都係碎哂，好冇趣。總係食唔番細路仔個時既米粉既，我鍾意唔好太幼身，成條粉通透得黎又要爽口，唔好綿PAT PAT咁，又唔好硬哂咁。哈哈，越係鍾意既野，就越係有要求。
回覆刪除你好，我呢隻係福字泰國銀絲米粉，響惠康買的。以前有隻「超力銀絲米粉」，我覺得仲好炒。
回覆刪除大陸D米粉唔得喇，好差。你可以試下用「摷」既方法，我做過一次「摷」米粉，冇咁易斷。